Azkoititik abiatuko da zapatuan, urriak 5, Elgoibarko 1. Rallysprinta. Azkoitia eta Elgoibar arteko Azkarate mendateko errepide zaharrean jokatuko dute proba, eta ibilgailuek Azkoitian izango dute irteera lerroa; zehazki, Olaran baserrirako bidegurutzearen ingurutik aterako dira autoak Elgoibar aldera, 14:00etan. Elgoibarko Sallobenterako bidegurutzetik gertu izango dute helmugako marra, 8,65 kilometroko ibilbidea osatu eta gero.
Etxebarriko (Bizkaia) Kastinparro Racing taldeak antolatu du larunbateko auto lasterketa; izan ere, Lea Artibaiko Rallyaz gain, Elgoibarko Rallysprinta antolatzeko ardura hartu zuen talde horrek denboraldi hasieran. Larunbateko lasterketa, gainera, Euskadiko Koparako puntuagarria izango da. Proba jokatuko den egunean trafikoarentzat itxita egongo da Azkarateko errepide zaharra, 12:45etik 20:00etara.