Realaren emakumeen aurreneko taldea sortu zutela 20 urte bete direla eta, atzo omenaldia jaso zuten talde hura osatu zuten kideek. Zubietan jaso zuten aitortza, Realaren emakumeek Levante Badalonaren aurka jokatu zuten partidaren atarian —etxeko taldeak 2 eta 1 irabazi zuen—.
Azkoitiko hiru futbolarik osatu zuten Realaren aurreneko talde aitzindari hura, Nahikari Etxaniz atzelariak, Estitxu Iturralde erdilariak eta Naroa Epelde atzelariak, hain zuzen. Eskualdeko beste zenbait jokalari ere taldekide izan zituzten hiru horiek, hala nola Olatz Yeregi atezain azpeitiarra, Ainhoa Mateos atzelari oriotarra, Laura Gomez atzelari zarauztarra, Oihana Galdona atzelari zarauztarra eta Maite Lizaso erdilari zarauztarra.