Plaza Ondo jubilatuen elkarteak urrian ekingo dio ikasturte berriari, eta martxa hartzeko egun osoko irteera antolatu du Gasteizera eta Gesaltza Añanara (Araba). Urriaren 17an egingo dute egunpasa herriko jubilatuek. Autobusez egingo dute bidaia, Aizkibel liburutegiaren alboko geralekutik 09:00etan abiatuta. Bazkaria, berriz, Olarizu jatetxean egingo dute.
Aurrez, baina, ohiko prozedura jarraitu beharko dute irteeran parte hartu nahi dutenek: izena ematea ezinbestekoa izango da. Datorren asteartean, urriak 1, zabalduko dute izen-ematea eta urriaren 11ra arte egongo da zabalik. Plaza Ondoko bazkideek 42 euro ordaindu beharko dute, eta bazkide ez direnek 48 euro. Elkarteak adierazi du hamarretakoa parte hartzaileek beraiek eraman beharko dutela irteerara, hala nahi izanez gero.