Azkoitiko Gazte Asanbladak (AGA) ikasturtea hasteko 0. Asanblada irekia egingo du bihar, asteazkena, Elkargunean, 19:00etan hasita. Asanbladaren "jardun politizatzaileaz" arituko dira bilkuran, baita "antolatuta egoteak duen garrantziaz" ere.
Era berean, ikasturte berrirako helburuak "fintzea" nahi du AGAk bihar. Besteak beste, herriko eragile eta talde desberdinekin elkarlan edo harreman gehiago izatea, gazteengana gehiago iristea eta gai ezberdinen bueltan formatzea dira asmoetako batzuk. Gainera, andremarien balorazioa egiteko tartea hartuko dute, baita ikasturte berriaren antolaketa eta horren bueltako ekintzak pentsatu ere.
"Gazteria, eta oro har, herriko jendea arduratzen duten arazoak eztabaidatzen eta tratatzen ahaleginduko gara. Ikasturteko lehen asanblada izango denez, hasiera bat izango da guztiontzat, eta jendearen kezkak, ideiak nahiz asmoak elkarbanatzeko momentu ona izango da", azaldu dute asanbladako ordezkariek.