Azkoitiko Irakurle Taldeak bihar, asteartea, ekingo dio 2024-2025 ikasturteari, eta aurreneko saioan ibilbide luzea duen idazle baten lana izango dute mintzagai eta aztergai. Ramon Saizarbitoria idazle donostiarraren Hamaika pauso lanaz hitz egingo dute 19:00etan, Elkarguneko Oteiza aretoan.
1995ean argitaratu zuen idazle donostiarrak Hamaika pauso eleberria, eta lanak Espainiako Kritikaren Saria jaso zuen. Hain zuzen, Espainiako Literatur Kritikarien Elkartearen narratiba eta poesia kategorietako literatura saria jaso zuen Saizarbitoriak. Eleberriez gain, saiakera eta poesia lanak ere argitaratuta ditu donostiarrak, guztira, hemezortzi bat lan.
Irakurle taldeak gogorarazi du saioak irekiak direla herritar guztientzat, eta beraz, edonork duela horietan parte hartzeko aukera. Azkoitiko Irakurle Taldean parte hartzeko edota egitasmoaren inguruko informazio gehiago jasotzeko, azkoitikoirakurletaldea@gmail.com helbidera idatz dezakete herritarrek.