Musika doinuek hartu dituzte goizean goizetik herriko txokoak, Azkoitia 700 egitasmoak Musika Eguna antolatua baitu gaurko. Txalkor txistulari taldeak eta Bizkargi musika eskolako trikitilari eta pandero joleek eman diote hasiera egunari, eta kalez kale ibili dira pandero eta txistu doinuak zabaltzen. Eguerdian, berriz, eguneko topagune izango diren Oteiza frontoietan elkartu dira hainbat herritar, eta hura girotzen izan da Albi disko jartzailea.
Bien bitartean, merkatariak eta ostalariak arratsaldeko azokari azken ukituak ematen aritu dira. Izan ere, 16:00etan zabalduko dute Merkataritza Fest, Herrixen elkartearen eta udalaren eskutik, herriko merkataritza balioan jartzeko eta aldarrikatzeko asmoz. Askotariko merkataritza, ostalaritza, artisau eta zerbitzuak elkartuta antolatu dute gaurko festa eguna, eta 20 bat jarduera batuko dira hango azokan: Aingeru Loradenda, Aitzaki Kirolak, Aizterri Home, Andueza arropa denda, Arrospide oinetakoak, Beatriz Pozo Dekorazioa, Noah arropa denda, Naiena arropa denda, N.K. Ile-apaindegia, Munibe arropa denda, Lukas lurrindegia, Odriozola Ardoak, Ibargoi Autoak, Hazia belar denda, Etxaniz autoeskola, Udatxo, Kiribil Zeramika, Ttakun taberna, Orbela taberna, Dona Doni Izozkiak eta Maite gozotegia.
Gainera, Merkataritza Festek Musika Egunarekin bat egingo du gaurkoan, eta askotariko kontzertuek girotuko dute Oteiza frontoian egokitu duten karpa. Honako egitarau hau izango dute arratsaldean hara joaten direnek:
- 16:00. Merkatarien eta ostalarien postuen irekiera ekitaldia.
- 16:00. Bulego taldearen kontzertu akustikoa.
- 17:00. Juan Andres Unanue.
- 18:00. Aitor Leon.
- 19:00. Kitziki taldea.
- 20:00. Eraldatzen taldea.
- 21:00. Attitte DJa.
- 22:00. Cavan taldea.