ACB Euskal Koparen finala jokatu zen atzo, ostirala, Azpeitiko kiroldegian Baskonia eta Surne Bilbao Basketen artean. Kiroldegiko harmailak goraino bete ziren saskibaloiko bi talde handien norgehiagoka bertatik bertara ikusteko.
Baskonia izan zen kopa etxeratu zuena 81-72 irabazita Bilbao Basketi. Finaleko norgehiagokaren aurreneko zatian bi taldeen arteko saskiratze trukea izan zen, eta Bilboko taldea puntu bakarraren aldearekin iritsi zen bigarren zatiaren hasierara, 23-24. Gero, ordea, zortzi puntu segidan lortu zituen Markus Howardek, eta 35-28 aurretik jarri zuen Baskonia. Atsedenaldira zortzi puntu aurretik iritsi zen Gasteizko taldea; 45-37.
Atsedenaren ondoren, aldea mantendu egin zuten Baskoniakoek, 52-45. Partida bukatzeko hamar minuturen faltan, ordea, Bilbao Basketekoek aldea gutxitzea lortu zuten markagailuan: 61-59. Partidaren azken zatian pareko ibili ziren, markagailuak 66-66 adierazteraino. Baina finaleko partidaren hondarrean Baskoniakoak tartea egin eta Euskal Kopa bereganatu zuten 81-72 irabazita.
Nagore Alkorta Azpeitiko alkatearen eta Ana Azkoitia Azkoitiko alkatearen eskutik jaso zuten kopa Baskoniakoek.
Aitortzak
Iraurgi saskibaloi klubaren 50. urteurrenari keinu eginez antolatu zuen Euskal Saskibaloi Federazioak Azpeitian atzoko ACB Euskal Koparen finala, eta hori horrela, Azkoitiko eta Azpeitiko saskibaloi klubaren izenean Maier Lizaso presidenteak oroigarria jaso zuen. Bestalde, klubaren 50. urteurreneko ospakizunen barruan, Iraurgi SBk hainbat aitortza egin zituen aurreko saskibaloi denboraldian, eta atzokoan ere beste bat egin zuten, eta berezia. Izan ere, Jose Luis Zubizarreta Xubiri egin zion ISBk aitortza, honek klubaren alde eta klubean urteetan egindako lana eskertzeko. Zubizarreta iazko ekainetik Gipuzkoa Basket saskibaloi klubaren kirol zuzendaria eta koordinatzailea da.
(Argazkiak: Mikel Amenabar Otola)