Datorren astelehenean, abuztuaren 12an, egingo dute hil honetako odol ateraldia, Elkarguneko Herriko Plaza aretoan; arratsaldez egingo dituzte ateraldiak, 16:30etik 20:30era bitartean. Odola eman ohi duten herritarrek honezkero hitzartuta dute ordua, baina odola ematen hasi nahi dutenek zein informazio gehiago nahi dutenek 610 11 21 45 telefono zenbakira deitu behar dute.
Batez beste odol emaile gehien dituen herrietako bat izaten jarraitzen du oraindik orain Azkoitiak –azken ateraldian 81 odol poltsa bildu zituzten–, baina Euskadiko Odol Emaileen elkartearen arabera, zenbait odol taldeetako erreserba maila oso baxua da, eta talde horietako odolaren premia handia dago. Hain zuzen, O+, O-, A+, A- eta B- odol taldeen maila zeharo baxua da; bost odol talde horietan dago behar handiena. Aldiz, erdi mailan daude AB+ eta AB- odol taldeak, eta eskasia gutxien dagoen taldea da B+.
Hori horrela, inoiz odola eman ez duten azkoitiarrei odola ematera joateko dei egin diete. Hurrengo hitzordua irailaren 2an, astelehenez, izango da; orduan ere arratsaldez egingo dituzte ateraldiak.