Sutea izan da bart Kale Nagusian dagoen Errexil tabernan. Ertzaintzak adierazi duenez, larrialdi zerbitzuek 03:00etan jaso dute bizilagunen abisua, eraikinaren alde batetik kea ateratzen ari zelako. Eraikinak egurrezko egitura duenez, bizilagunek kanpora atera behar izan dute, eta iturri horren arabera, osasun langileek adineko pertsona bat artatu dute, baina ez da inor zauritu.
Ertzaintza, suhiltzaileak zein anbulantzia bertaratu dira ezbeharraren lekura, eta suhiltzaileek egoera aztertu ostean, bizilagunek 05:30 aldera itzuli ahal izan dute etxebizitzetara. Suhiltzaileen arabera, sukaldean piztu da sua, eta "oso kaltetuta" geratu da hura.