Gobernu Kontseiluak Mikel Juaristi izendatu du Eusko Jaurlaritzako Aniztasunerako eta Hezkuntza Inklusiorako zuzendaria, eta aurreko legealdian Lucia Torrealdaik izan zuen kargua hartuko du azkoitiarrak.
Pedagogian eta Lehen Hezkuntzako Irakaskuntzan lizentziatua da Juaristi, eta Gizarte eta hezkuntza ikerketan masterra du egina. Era berean, azken urteetan Barakaldoko (Bizkaia) Gurutzeta ikastetxe publikoko Haur eta Lehen Hezkuntzako zuzendaria izan da.
Hezkuntzaren arloan ez ezik, politikagintzan ere esperientzia du Juaristik: Azkoitiko Udaleko EAJren zinegotzia izan zen 2007-2011 agintaldian. Era berean, Eusko Legebiltzarrerako azken hauteskundeetan hautagai aurkeztu zen Bizkaiko EAJren zerrendan.