Auzoko jaiak ospatuko dituzte asteburuan Urrategin

Uztaileko bigarren asteburuarekin batera, aurten ere jaietan murgilduko dira Urrategi auzoan. Ostiralean hasiko da festa han, egun horretan 22:00etan jokatuko duten mus txapelketa azkarrarekin. Lau sari egongo dira jokoan: lehen sailkatuek txapelak eta 350 euro eramango dituzte; bigarren sailkatuek, 150 euro; hirugarrenak, Isidro erretegian bi lagunentzako afaria, eta laugarrenak, bi oilasko.

Txapelketarako izen-ematea egunean bertan izango da, Urrategiko elkartean. Bikoteko hogei euro ordaindu beharko da inskripzioa, eta joko legea ere zehaztu dute antolatzaileek: lau erregetara, lau usteletara eta lau hamarrekotara izango da lehia.

Larunbatean, berriz, auzo bazkaria egingo dute Urrategiko auzotarrek, eta igandean izango dira festetako ekitaldi nagusiak. 09:00etan eta 11:00etan meza bana egingo dituzte han; bigarrena izango da eguneko elizkizun nagusia. Horren ostean, 12:30 aldean, Joanes eta Xabat Illarregi anai bertsolarien saioa eta Zabale, Aintzane eta Lutxurdio trikitilarien erromeria izango dira.

Arratsaldean jarraituko du festak Urrategin. 16:00etan, haurrentzako jolasak izango dira, eta 17:00etan, Iago magoaren ikuskizuna. 18:00etan, berriz, herri kirol proba konbinatua jokatuko dute Jon Unanue Goenatxo III.ak zein Mikel Larrañagak eta Olaia Esnaolak eta Julen Alberdi Txikia IV.ak. Herri kirolen ondoren eta jaiak amaitzeko, Zabale, Aintzane eta Lutxurdio trikitilarien erromeria izango da.

Hona hemen Urrategiko jaien egitaraua, osorik:

• Uztailak 12, ostirala:
  • 22:00etan, mus txapelketa azkarra.
    • Sariak:
      • 1. Txapelak eta 350 euro
      • 2. 150 euro.
      • 3. Isidro erretegian bi lagunentzako afaria.
      • 4. Bi oilasko.
• Uztailak 13, larunbata:
  • Auzo bazkaria egingo dute elkartean.
• Uztailak 14, igandea:
  • 09:00etan, meza.
  • 11:00etan, meza nagusia.
  • 12:30ean, Joanes eta Xabat Illarregi bertsolariak.
  • Ondoren, Zabale, Aintzane eta Lutxurdio trikitilariak.
  • 16:00etan, ume jolasak.
  • 17:00etan, Iago magoaren ikuskizuna.
  • 18:00etan, herri kirolak. Goenatxo III.ak eta Mikel Larrañagak, Olaia Esnaolaren eta Julen Alberdi Txikia IV.aren aurkako proba konbinatua jokatuko dute.
  • Ondoren, Zabale, Aintzane eta Lutxurdio trikitilarien erromeria.