LGTBI+ Komunitatearen Nazioarteko Egunari lotutako ekintzak hasi zituzten atzo Azkoitian, Zarata proiektuaren aurkezpenarekin. Hodei Arrastoa artistak sortutako audio-gida prestatu zuen egileak berak Portaleburu erakusketa aretoan, eta hara bertaratu ziren hainbat herritarrei erakutsi zien egitasmoa. LGTBI+ kolektiboaren inguruan kontzientzia sortzea helburu du proiektuak, eta horretarako hamar gunetan banatutako eremua prestatu zuen, bakoitzean gai propio batez hausnartzeko asmoz.
Bihar, bestalde, elkarretaratzea egingo dute herriko plazan, 18:00etan hasita, eta ordu erdi beranduago Askatu. Armairuko gogoetak antzezlana aurkeztuko du La Piel Producciones ekoiztetxeak Elkargunean. Sexu askapenari eta identitateari buruzko lana da Fermin Cariñenak zuzentzen duena.
