Xabi Oroz saskibaloi jokalari azkoitiarrak ez du Gipuzkoa Basketen jokatuko datorren denboraldian. Lehen taldean zortzi denboraldian jokatu ondoren, taldearen kapitain izan denak kontratua ez berritzea erabaki du.
Klubak atzo ezagutarazi zuen Orozen erabakia, eta azkoitiarrak hedabideen aurrean hitz egin du gaur Jose Luis Zubizarreta Xubi GBCko kirol zuzendaria alboan zuela. Bere ibilbideko "unerik onenean" dagoela adierazi du Orozek prentsaurrekoan, eta kluba uztea erabaki "zaila" izan den arren, "gauza berriak probatzeko gogoz" dagoela gaineratu du hark. Era berean, gutun bat irakurriz, klubari eta zaleei eskerrak eman dizkie. Datorren denboraldirako asmoez galdetuta, berriz, "oraindik ezer erabaki gabe" duela adierazi du.
Ansorregi, Espainiako selekzioarekin
Manex Ansorregi saskibaloi jokalari azkoitiarra, aldiz, 22 urtez azpiko Espainiako selekzioak deitu du Melilla Hiria Txapelketa jokatzeko. Espainia, Alemania, Txekiar Errepublika eta Estatu Batuak lehiatuko dira Melillan, eta astelehenaz geroztik jokalariek entrenamenduekin dihardute han. Igandetik aurrera jokatuko dituzte elkarren aurkako partidak, Javier Imbroda Ortiz kantxan. Igandeko partidan Espainiak Txekiar Errepublika izango du aurkari; astelehenean, Estatu Batuak; eta asteartean, Alemania. Partida guztiak 20:15ean hasiko dira.