Haurrak eta euskal dantzak izan dira gaur eguerdiko protagonistak Azkoitian. Izan ere, Bizkargi musika eta dantza eskolako dantzariak, trikitilari zein pandero jotzaileak, eta Txalkor txistulari taldea kalera atera dira Dantzarien Udaberri Kalejira egitera.
11:30ean Julio Urkixo etorbidean elkartu dira dantzariak eta musikariak, eta handik Balda plazara kalejira egin dute. Eguerdiarekin batera eguneko lehen dantza saioa eskaini dute plaza horretan, eta 12:30ean Inazio Iriarte Margolaria kalerantz beste kalejira egin dute, handik herriko plazara joan eta han azken emanaldia eskaintzeko. Guraso eta herritar talde zabala izan dute une oro atzetik haur eta gaztetxo dantzariek.