Bingen Aranbarri azkoitiarrak irabazi du Iñaki Iruretaren omenezko Zestoako 44. Herri Krosaren ibilbide motza. Gaur goizean, 10:00etatik hasita, jokatu dituzte haurren zein helduen probak herrian. Hala, Aranbarrik 9 minutu eta segundu 1 behar izan ditu 2,6 kilometroko lasterketa amaitzeko.
Hain zuzen, bi ibilbide ezberdin izan ditu helduen lasterketak: luzea (8,5 kilometrokoa) eta motza (2,6 kilometrokoa). Ibilbide luzeari dagokionez, gizonetan Aitor Mimenza izan da helmugara heltzen aurrenekoa; emakumeetan, berriz, Eneritz Aramendi izan da azkarrena. Ibilbide motzean, Bingen Aranbarri iritsi da aurrena; emakumeetan, berriz, Naiara Tena.
Antolatzaileek jakitera eman dutenez, helduen lasterketa luzean 86 korrikalarik hartu dute parte; motzean, berriz, 61 parte hartzaile izan dira. Korrikalari guztiak helmugara iritsi ondoren, 12:45 aldera, sari banaketa egin dute.