Babesa erakutsi die Azkoitiko Udalak martxoaren 3an Donostian izango den Lilatoia emakumeen lasterketa herrikoian parte hartuko duten emakumeei, "berdintasuna korrika aldarrikatzeagatik".
Mertxe Zubillaga Berdintasun zinegotziaren esanetan, "ezinbestekoa da emakumeen parte hartzea arlo guztietan, eta noski, kirolean. Lilatoiak berdintasunaren aldeko sentsibilizazio lanarekin jarraitzeko testuingurua ematen digu eta hori oinarrizkoa da".
Aurten, Azkoitian denok antxintxika berdintasunerantz leloa daramaten kamisetak egin eta banatu ditu udalak, atletismoko klubekin elkarlanean. "Lilatoian Azkoiti herriak presentzia nabarmena izan dezan".