Baztartxo antzokian datorren hilean izango diren bi ikuskizunetarako sarrerak jada eskuragarri daude Entradium atarian. Alde batetik, Jon Plazaolak Tu Tum Platz umorezko bakarrizketa saioa eskainiko du otsailaren 3an, 19:00etan hasita. Plazaolak taula gainean bere lehen agerraldia egin zuenetik 23 urte pasata, berriro ekin dio bakarrizketa formatuari; hori bai, "23 urte zaharrago, 23 urte jakintsuago eta 23 urte kabroiago", dio ikuskizunaren deskribapenak. Sarrerak jada eros litezke, 10 euroren truke.
Aldiz, Go!azen 10.0 Basakabitik mundura ikuskizunaren emanaldi bikoitza izango da otsailaren 17an Baztartxo antzokian, lehena 16:00etan eta bigarrena 18:30ean. Go!azen telesailak 10 urte eta 100 atal beteko ditu aurten. Hori horrela, hamargarren denboraldiko abesti onenen bilduma kaleratu berri dute, taldekideen ahotsekin eta atzoko zein gaurko musika taldeen egokitzapen berriekin. Denboraldi berriaren baitan bi saio eskainiko dituzte Azkoitian eta horietarako sarrerak 8 euroren truke eskura litezke.