Hainbat emakume Women Mediterranean Stages campusean parte hartzen ari dira asteburu honetan, Azkoitiko Abaraxka aterpetxean. Bikefriendly etxeak Azkoitiko Udalaren laguntzarekin antolatutako egitasmoa da Women Mediterranean Stages campusa, eta atzo hasita, txirrindularitzarekin lotura duten hainbat jarduera gauzatzen ari dira parte hartzaileak.
Gaur goizean, esaterako, 100 kilometroko ibilbidea egin dute Elgoibar, Markina, Lekeitio, Ondarroa, Mutriku, Deba, Itziar, Zumaia, Zestoa eta Azpeitia zeharkatuz. Arratsaldean, berriz, Bizikletaren mekanika, helburuen araberako entrenamendua eta elikadura gaitzat hartuta, hitzaldia izan dute. Bihar, 72 kilometroko beste irteera bat egingo dute Goierri aldera. Kasu horretan, Nuarbe, Mandubia, Ormaiztegi, Atagoiti, Udana, Udana, Legazpi eta Zumarraga zeharkatuko dituzte.
