Jose Luis Zubizarreta Xubi azpeitiarra izango da Gipuzkoa Basket saskibaloi klubaren kirol zuzendari berria. Twitterreko txio baten bidez jakinarazi du horren berri Donostiako saskibaloi klubak, adieraziz Zubizarretaren kargu hartzeak "Gipuzkoako saskibaloia garatzeko eta sustatzeko konpromisoa" sendotuko duela.
Zubizarreta orain arte Iraurgi saskibaloi klubaren koordinatzaile aritu da, hamarkadak egin ditu jardun horretan. Hark Azkoiti-Azpeitiko saskibaloi klubean izan dituen hainbat arduren lekukoa Ibon Guridik hartuko du. Guridi arduratu da azken denboraldietan Iraurgi SBren formazio arloaz, eta Juaristi ISB taldeko kapitaina ere bada.