Bihar, asteazkena, Zubiberri gimnastika erritmiko taldeko kideek ikasturte amaierako jaialdia eskainiko dute Elkargunean. 18:30ean hasiko da ikuskizuna, eta 86 gimnastak parte hartuko dute. Guztira, 23 ariketa erakutsiko dituzte jendaurrean.
Gimnastak uztaiarekin, mazoekin eta zintekin ikusteko aukera izango da bihar arratsaldean, banaka zein taldeka. Ikasturte guztian ikasitako eta landutako lanak aurkeztuko dituzte, baita biharko ikuskizunerako bereziki prestatutako dantzak eta koreografiak ere.
Bilboko Ekilore txapelketan
Herenegun, igandea, Bilboko Ekilore txapelketan parte hartu zuten Zubiberriko gimnastek. Amaia Sudupek pilotarekin egin zuen ariketa, eta Nikole Aranbarrik mazoekin. Sudupe bigarren sailkatu zen, eta Aranbarri hirugarren.
