Etzi, igandea, kontzertua eskainiko du Makulu Ken taldeak Azkoitiko Abaraxka aterpetxean. 17:00etan hasiko da kontzertua aterpetxean, eta emanaldia zuzenean jarraitu nahi dutenek 8 euro ordaindu beharko dute sarrera.
2007an sortu zen Makulu Ken taldea Lasarte-Orian (Gipuzkoa). Afrobeat estiloko musika taldea da, taldekideek euskalafrobeat deitzen dutena. Taldea izendatzen duen izen berarekin, 2012. urtean kaleratu zuen Makulu Ken taldeak ibilbideko aurreneko diskoa. 2016an, berriz, Kalè kalè izeneko bigarren album bat kaleratu zuen Durangoko Azokarako.
Eider Ormazabalek (ahotsa eta xekerea), Xabier Herrera Xa2 makuluk (ahotsa eta gitarra), Bea Hurtadok (teklak), Iñigo Suberbiolak (kongak eta djenbea), Unai de Andres Patxusek (baxua), Nagore Etxabek (bateria), Pau Torresek (saxo baritonoa), Ixak Oiartzabalek (saxo tenorra) eta Julen Rodriguezek (tronpeta) osatzen dute musika taldea.
Emanaldiak herriko tabernetan
Abaraxkako kontzertua ez da izango asteburuko musika emanaldi bakarra. Gaur, ostirala, Tta-kun tabernan Albi DJa arituko da musika jartzen 23:45etik aurrera, eta bihar, larunbata, Desguaze Music Fest egingo dute Txalintxo tabernan. Triki, Beba, Panda eta House One arituko dira musika jartzen.