Azaroaren 18tik abenduaren 2ra izango da Euskaraldiaren aurtengo edizioa, eta Azkoitiko Euskaraldiko batzordea dagoeneko hasi da prestaketa lanetan. Aurten, merkatarien parte hartzea sustatu nahi dute, eta horregatik, bihar, asteartea, bilera bat deitu dute merkatariekin hitz egiteko, 15:30ean, Elkarguneko Zeharkako gelan (lehen solairua).
Bilera "motza eta oso praktikoa" izango dela zehaztu dute Euskaraldiko batzordeko kideek, eta, bertan, Euskaraldiaren helburu orokorrak azalduko dituzte; era berean, izena emateko aukera ere izango dute biharko juntadizora joaten diren merkatariek.
Bilerara joan nahi dutenei aurrez abisatzeko eskatu diete. Maxixatzen@maxixatzen.eus helbide elektronikora mezu bat bidali beharko da horretarako, edo 675 85 71 11 telefono zenbakira deitu. Bihar agertzerik ez duenak bi modu horien bitartez eskura dezake egitasmoaren inguruko informazio gehiago.
