Kriketaren asteburua izan da herrian. Azkoitiko X. Kriket txapelketa jokatu da Oteiza frontoietan, eta ehun lagun inguru aritu dira lehian larunbatean zein igandean. Guztira, 14 talde aritu ziren asteburuan nor baino nor; besteak beste, Azkoitia, Azpeitia, Zestoa, Zumarraga, Ordizia, Eibar, Donostia (Gipuzkoa), Gasteiz, Agurain (Araba), Logroño eta Burgos (Espainia).
Atzo arratsaldean jokatu ziren partida erabakiorrak, eta talde irabazlea Zumarragakoa izan zen, eta Azkoitiko taldeak, berriz, bigarren postua lortu zuen. Sari horiez gain, baina, beste hiru ere banatu zituzten: Eibarko Azhar Khan-ek jaso zuen jaurtitzaile onenarena, jotzaile onenarena Azkoitiko Shoaib Ahmed-ek, eta kirolari onenarena, aldiz, Zumarragako Waseem Ahmed-ek.