Juaristi ISBk partida garrantzitsua jokatu zuen atzo, igandea, Azpeitiko kiroldegian. Izan ere, jaitsiera postuetatik atera ezinda jarraitzen du taldeak, eta ez zuen erronka makala atzokoa: sailkapenaren buruan den Coviran Granadaren aurka neurtu zituzten indarrak. Partida zaila izango zela bazekiten arren, neurketa guztian zehar markagailuan aurretik joan ostean, 74 eta 62 irabazi zuten Iraurgikoek.
Atzoko partidan eskuratutako puntuak jaitsiera postuetatik ateratzeko behar-beharrezkoak izango diren arren, oraindik ere sailkapeneko azken hiru postuetan da Iñaki Jimenezen taldea; zehazki, hamaseigarren postuan. Dena den, koska bat gora egin dute Iraurgikoek; izan ere, partida kopuru bera jokatuta eta puntu kopuru bera poltsikoratuta dago sailkapeneko hamabosgarren taldea: CB Prat taldea, hain zuzen ere. Beraz, pixka bat gertuago dute salbazioa. Lau jardunaldi gelditzen dira Urrezko LEB ligaren fase erregularra bukatzeko, eta badute tartea Iraurgikoek helburua lortzeko.
Atzoko neurketan, Ibon Guridi izan zen saskiratze gehien egin zuen jokalaria: guztira, hamasei puntu erdietsi zituen hark. Neurketako jokalaririk onena, bestalde, Dijkstra izan zen.