Igandean, apirilak 3, XXI. Taldez Talderen azken emanaldia izango da Kontzejupean. 12:30ean hasita, Bizkargi musika eta dantza eskolako instrumentu taldea eta hango dantzariak arduratuko dira Kontzejupea girotzeaz. Taldez Talderez azken kontzertua izango da igandekoa; izan ere, azken bi igandeetan izan dira emanaldiak herriko plazako pilotalekuan.
Lehen asteburuan, Iraurgi eta Bizkargi abesbatzak elkarrekin aritu ziren, eta bigarrenean, euskal musika tresna jotzaileak eta dantzariak izan ziren prostagonistak. Igandean, berriz, musika eskolako saxofoi taldeak, biolin taldeak, gazte bandak, dantzariek eta abeslariek parte hartuko dute, Gorka Errezil zuzendariaren agindupean. Besteak beste, Sunday morning, Funk four, Rondeau, In the jungle, Baratzeko pikuak, Pastelero, Irureta, Prashkuarena, Mendian gora haritza, Xalbadorren heriotzean eta Nere herriko neskatxa maite abestiak eskainiko dituzte.