Bizkargi musika eta dantza eskolako kideek antolatuta, XXI. Taldez Talderen bigarren saioa izan da gaur, igandea, Kontzejupean. Trikitia, panderoa edota txistua lagun zutela, hainbat euskal abesti ezagun taularatu dituzte ikasleek, eta euskal dantzez gozatzeko parada ere izan da eguerdian. Guztira, 50 ikasle inguruk parte hartu dute emanaldian, eta gutxienez beste horrenbeste elkartu dira horiek ikustera.
Joan zen igandean hasi zuten Taldez Talderen edizio berria, eta Iraurgi zein Bizkargi abesbatzako kantariek eskaini zuten kontzertua orduan. Datorren igandean ere beste emanaldi bat izango da; hona hemen Bizkargi eskolak iganderako prestatu duen egitaraua.