Aurten itzuliko da Pelotai Eune Azkoitira. Ekainaren 18an ospatuko dute Azkoitian pilota eta jaia uztartzen dituen eguna. Beste behin Kontzejupeko pilotalekuaren bueltan elkartuko dira herriko pilotazaleak egun horretan, baita hura iritsi baino lehen ere.
Binakako pilota txapelketa antolatu dute Pelotai Euneren antolatzaileek, eta eguna iritsi baino lehen jokatuko dituzte txapelketaren aurreko fase eta kanporaketa gehienak. Pilota txapelketarako izen-ematea ireki dute dagoeneko; apirilaren 10era bitartean, Azkoitiko Latz, Dean eta Tta-kun tabernetan eman ahalko dute izena herritarrek.
2015. urtean antolatu zuten lehenengoz Pelotai Eune, herrian "sustraituta" dagoen kirolari "bultzada" emateko asmoz. Aurten seigarren aldiz ospatuko dute eguna. Antolatzaileek datozen asteetan emango dute txapelketaren gaineko informazio guztia, baita Pelotai Euneri lotutako ekintza guztien berri ere.