Duela zazpi egun hasi zen Ukrainaren aurkako inbasioa, eta hori aintzat hartuta, Azkoitiko kristau elkarteak Ukrainako herriari elkartasuna adierazteko elkarretaratzea egin du gaur, asteazkena, eliz atarian. Parrokiako taldeak egindako deiari erantzunez, dozenaka herritarrek egin dute bat kontzentrazioan, eta gerrari uko egiteko eskatu dute.
Gerrarik ez, Ukrainako herriarekin bat lelopean elkartu dira eliz atarian. Gerrarik ez! zioen pankartaren bueltan elkartu dira herritarrak, eta bost minutu inguruko kontzentrazio isila egin dute, kandelak piztuta. Amaieran, Egin gaitzazu pakearen zerbitzari abestia kantatu dute eliz atarian bildu diren lagunek.