Beste aste batez Pasira egitasmoaren barruko ibilaldia egin dute gaur. Gaur, ordea, inoiz baino kolore eta indar handiagoarekin osatu dute ibilbidea saioan parte hartu duten herritarrek. Ostegun Gizen eguna dela baliatuta, zenbait herritar mozorrotuta eta musikak lagunduta ibili dira herriko kaleetan zehar. Gainera, Jausoroko txapel fabrikako tximini parean egin dute geldialdia herriko historiari begirada bat botatzeko asmoz. Juan Bautista Mendizabal Ondare zinegotziak eman dizkie 1846an sortutako fabrikaren inguruko zertzeladak.
Azkoitiko Udalak, haren Kirol Orientazio Zerbitzuak, Izarraitz Lanbide Heziketa zentroak, Plaza Ondo jubilatuen elkarteak, Azkoitia Lagunkoia egitasmoak, Caritasek eta Gurutze Gorriak jarri zuten martxan ibilbide osasungarrien programa, iaz: Tipi-Tapa. Herritarrak ostegunetako irteeran parte hartzera animatu nahi dituzte.
