LH DuaLa Euskaraz egitasmoaren aitortza ekitaldia egin zuten atzo, ostirala, Bergaran (Gipuzkoa). Gipuzkoako Foru Aldundiak euskararen erabilera zabaltzeko ahaleginean erreferenteak diren Gipuzkoako lantokiei eta Lanbide Heziketako ikastetxeei egin zien aitortza Miguel Altuna Institutuan, tartean Azkoitiko Izarraitz Lanbide Heziketari. Eneritz Elorza azkoitiarrak jaso zuen oroigarria Izarraitz Lanbide Heziketa ikastetxearen izenean.
Laneki elkartea arduratzen da Lanbide Heziketarako euskarazko baliabideez, eta harekin batera Ikaslan eta Hetel elkartekideek sustatzen dute LH-Duala Euskaraz. Helburua da Lanbide Heziketan euskarak duen balioaren kontzientzia eta jarrera piztea. Era berean, heziketa zein lana euskaraz garatzeak duen balioa ikusaraztea eta Lantokiko Prestakuntza eta Duala (LP-Duala) euskaraz egiten ari diren lantokien komunitateko esperientziak aitortzea ditu xede proiektuak.
Lantokiek egitasmoari ematen dioten zerbitzuari ere egin zioten aitortza atzo Bergaran. Proiektua lantokian urte batean baino gehiagotan garatu izana, dualean izandako ikasleak enpresan bertan lanean geratu izana eta lantokiaren izaera anitza hartu zituzten kontuan errekonozimendua egiteko. Azpeitiko Astigarraga Kit Line enpresaren lana nabarmendu zuten, eta Aitor Gil azkoitiarrak hartu zuen hari emandako oroigarria.