Munoaundiko lursail bat Urola Bizirik taldearen esku utzi du Azkoitiko Udalak, eremu horretan basoa era dezan, eta gaur, zapatua, goizean goizetik hainbat zuhaitz landatu dituzte herritarrek han. Natur taldeak 09:30erako zuen hitzordua jarrita, eta Abaraxka aterpetxetik oinez joan dira ekintzara batu diren herritarrak, Urola Bizirikekoek gidatuta.
Orotara, 60 zuhaitz sartuko dituzte Artadi mintegiko arduradun Geert Roelsen aholkuak jarraituz; besteak beste, astigarra, gurbitza, hurritza, artea eta lizarra landatuko dituzte Munoaundin. Landaketaren inguruko xehetasunak azaldu dituzte Roelsek eta Urola Bizirik taldeko Iñaki Eizagirrek lanean hasi aurretik, eta, ondoren, aitzur-lanean aritu dira hainbat haur, gazte eta heldu natur taldearen lursailean. Antolatzaileek adierazi dutenaren arabera, gaurkoa "hasiera" bakarrik ez da izan, eta datozen asteetan eta hilabeteetan jarraituko dute lanean.