Sanandres egunean egin ohi den marrazki eta pintura lehiaketa bertan behera uzteko erabakia hartu du Azkoitiko Txuri Urdin elkarteko batzordeak. COVID-19aren bilakaera hartu dute kontuan lehiaketa bertan behera uzteko. Egin izan balute, XXXIX. lehiaketa izango zen aurtengoa.
14 urte bitarteko neska-mutilek parte hartu ohi dute lehiaketan. Hiru mailatan bereizten dute lehiaketa, A maila –8 urte arte–, B maila –9 eta 11 urte bitartekoentzat– eta C maila –12 eta 14 urte bitartekoentzat–. Tenpera lehiaketan, aldiz, 12 eta 14 urte bitarteko hiru partaideko taldeek parte hartzen dute. San Andres egunean, Jausoron banatzen dute materiala, 09:00etan, eta 12:00etarako lanak amaituta eduki behar izaten dituzte gaztetxoek.