Lazkao Txiki bertsopaper lehiaketa jokatu zuten atzo, igandea, Ordiziako (Gipuzkoa) Barrena kultur etxean. Argi Berri elkarteak Ordiziako Udalarekin batera antolatu zuen atzoko saioa, 30. aldiz. Hainbat bertsolarik parte hartu zuten lehiaketan, eta Naia Arrizabalaga azkoitiarrak lehen saria eskuratu zuen gazteen mailan; hau da, 14-18 urte artekoetan. Maila horretan sei lan aurkeztu zituzten guztira, eta epaimahaiak erabaki zuen azkoitiarraren Ez zatoz sortako bertsoak izan zirela onenak.