Eusko Jaurlaritzaren Osasun Sailak argitaratu berri ditu atzo, astelehena, egindako PCR eta antigeno proben emaitzak, eta, guztira, bederatzi kasu berri izan dira Urola Kostan. Azkoitian kasu bakarra zenbatu dute, eta atzoko tasa metatu bera mantendu da: 150,20. Beraz, eremu horian jarraitzen du Azkoitiak. Bestalde, atzoko datuekin Azpeitia eremu gorritik laranjara igaro da, han ez baitute kasu berririk hauteman, eta gaur-gaurkoz, 361,37 da bertako 100.000 biztanleko azken hamalau egunetako intzidentzia tasa. Txanponaren bestaldean Zumaia dago; izan ere, bi kasu berri hauteman ditu han Osasun Sailak, eta eremu laranjatik gorrira igaro da kostako herria. 407,04 da hango tasa metatua.
Eskualdean kasurik gehien Zarautzen detektatu dituzte: lau. Hala eta guztiz ere, Urola Kostako herririk handieneko tasa metatuak 325,52 izaten jarraitzen du; horrenbestez, eremu laranjan dago. Bestalde, Getarian bi kasu zenbatu dituzte, eta 636,04 da hango tasa. Eskualdeko gainontzeko herrietan ez da kasu berririk izan, eta honakoak dira herri horietako tasak: 50,38 Aian, 260,08 Aizarnazabalen, 806,45 Beizaman, 644,12 Errezilen, 212 Orion —eremu horian dago— eta 487,93 Zestoan.
Ospitaleetako presioak, behera
Hego Euskal Herrian, bestalde, 7.879 PCR eta antigeno proba egin zituzten atzo Osakidetzak eta Osasunbideak, eta horietatik 607 izan ziren emaitza positiboak. Lurraldez lurralde, Bizkaian atzeman dituzte kasu gehien (260), eta ondoren, Gipuzkoan (178), Nafarroan (102) eta Araban (60). Araba, Bizkai eta Gipuzkoatik kanpoko zazpi herritarrek ere positibo eman dute proban.
Ospitaleratzeei dagokienez, hobera egin dute datuek. Araba, Bizkai eta Gipuzkoan 323 dira erietxeetan dauden gaixoak, eta horietatik 89 daude ZIUetan. Nafarroan, berriz, 87 pertsona daude ospitaleratuta, eta 27 dira ZIUetan daudenak. Positibotasun tasari dagokionez, %8,1 da Araba, Bizkai eta Gipuzkoan, eta %6,2 Nafarroan.