Datorren ostiralean, abuztuak 6, Zubiberri gimnastika erritmiko taldeko ikasleek erakustaldia eskainiko dute jendaurrean. Elkarguneko barruko pistan eskainiko dute ikasleek ikuskizuna, 18:00etan hasita. 7 eta 13 urte bitarteko bederatzi ikaslek parte hartuko dute.
Zubiberri taldeak jakinarazi duenez, guztira zortzi ariketa eskainiko dituzte Elkargunean. Zortzi horietatik seitan binaka edo hirunaka egingo dituzte ariketak; beste bi ariketetan, berriz, bederatzi ikasleak elkarrekin arituko dira. Ikaslerik gazteenek hiru ariketetan parte hartuko dute, eta nagusienek lautan.
Ikasleen familiek ostiraleko ikuskizuna bertatik bertara ikusteko gonbidapenak jasoko dituzte.