Igandean, azaroak 29, EusKdivarius Kameratak Beethoven jaio zela 250. urte bete direla ospatzeko kontzertua emango du, Azkoitiko parrokian. 19:00etan hasiko da doako emanaldia, eta musikari alemaniarraren 8. sinfonia interpretatuko dute Fa minorrean. Arkaitz Mendoza arituko da zuzendari lanetan.
Kontzertuan, gainera, ez dute musika bakarrik eskainiko. Beethovenek 8. sinfonia konposatu zuen une historikoan ere murgilaraziko dituzte ikus-entzuleak hainbat azalpenekin; garai hartan Azkoitiko herriaren egoera zein zen ere azalduko dute. EusKdivarius duela gutxi sortutako taldea da, beren hitzetan "ilusio eta energia handia" duen taldea. Beethoven musikari alemaniarraren espiritua zabaldu nahi dute kontzertu hauekin. "Guretzat desafio hutsa da, baina badugu nahikoa ahalmen eta teknika horretarako", azaldu du Mendoza zuzendariak.
Azkoitiko kontzertua Kamerataren azken bigarrena izango da. Uztailean hasi zuen EusKdivariusek Arrasaten (Gipuzkoa) bira, eta abenduaren 15ean amaituko du, Donostian. Bitarte horretan lehen sinfoniatik bederatzigarrenerainoko guztiak eskainiko dituzte.