EH Bilduko eta Azkoitia Baiko hautagaiek, Urrategi Alberdik eta Jose Joaquin Etxanizek, hartuko dute parte mahai-inguruan. EAJko hautagai Javier Zubizarreta, PSE-EEko hautagai Miguel Pascual eta PPko Maria Pilar Elias hautagaiei ere gonbitea luzatu diegu, baina parte ez hartzea erabaki dute. Moderatzaile lanetan Maxixatzeneko kolaboratzaile Irene Elorza arituko da.
Urola Kostako Hitzak, Erlo Telebistak eta tokian tokiko herri komunikabideek elkarlanean, eskualdeko herri ia denetan udal hauteskundeetako mahai-inguruak antolatu ditugu. Hautagai guztiak mahai baten bueltan eseri, eta hauteskunde programaren inguruan herritarren aurrean hitz egitea da helburua.
Ekitaldia herritarrentzat irekia izango da. Maiatzaren 13an da hitzordua, Elkargunean, 19:00etan. Bertaratu ezin dutenek, Maxixatzenen web-orritik izango dute zuzenean jarraitzeko aukera, streaming bidez.