Zorionekoak gu, antzerkizaleak garenok, 2013 urtea Azkoitian antzerkiz betea baitago!!!
Alde batetik, herri ekimenetik bultzatu den antzerki sarea dugu, hilean behin antzerkiaz
gozatzeko aukera emango diguna. Bestetik, Matadeiko antzerki jardunaldiak ditugu otsailetik
ekainera bitartean, 9 emanaldiz gozatzeko aukera emango dizkigutenak. Eta azkenik, udaletxetik
programatzen jarraituko dituzten antzerkiak.
Bada bai ze ikusia gure herrian!!! Eta gustu handiz emanaldi hauen berri ematen saiatuko naiz.
OTSAILEKO ANTZERKIAK
OTSAILAK 3
POZA antzezlana izango dugu Matadeixen arratsaldeko 19:00etan; aurre-estrenaldia izango da.
Edertasunak itxaropena sortzen du, horregatik egin ohi zaio kontra.
Esperientzia lazgarri bat bizi izan duen inor ikustea mozkortzen,
dantzatzen, ahotsa kantu betean urratzen… horren lekuko denari
sortzen zaion egonezina da lan honen abiapuntua.
Izutzeraino gozoak diren uneak, hunkiduraraino ederrak diren krudeltasunak.
Arte ezberdinen arteko elkarrizketa abiatu dute Metrokoadroka
kolektiboko kideek, eta topatutakoa ia beti izan da beste galdera bat.
Elementu ez eszenikoetatik abiatu dira egileak eszenarako lan bat
osatzeko, oholtzarako poesiaren bidean.
OTSAILAK 16
SAHARA antzezlana, arratsaldeko 20:30ean Baztartxon. Lasarteko KUKUKA taldearen eskutik.