UEMAk Egin nirekin ere euskaraz! kanpaina abiatu du bigarrenez, euskaldun arrazializatuen inguruko aurreiritziak gainditzeko asmoarekin. Hain zuzen, beste herrialdeetatik Euskal Herrira etorri, euskara ikasi eta jendaurrean lan egiten duten ostalaritzako eta merkataritzako langileak dira kanpainaren oinarri, eta egitasmo horren aurpegietako bat da Michele Abrego, Azkoitian bizi den mexikarra.
Aizpurutxo auzoan dagoen Itziar jatetxean egiten du lan Abregok, eta AEKn ikasten du euskara. Hark bezala, kanpainan parte hartu duten guztiek ikasi dute euskara, eta euskaraz aritzen dira berezoekin; UEMAk azaldu duenez, ordea, askotan, "azalaren koloreagatik, aurreiritziengatik edota auskalo zergatik" erdaraz hitz egiten diete haiei gainerako herritarrek. "Badakite, ordea, euskara dela zubirik ederrena, eta euskara ukatzen dieten bakoitzean zubia ere ukatzen dietela sentitzen dute. Kanpokoak direla esaten zaie zeharka". Horregatik, kanpainako parte hartzaileek herritarrei dei egin diete haiei ere euskaraz mintzo diezaioten.