Gaur arratsaldeko 17:30etan Orioko Mendibeltz futbol zelaian Getariako KETA taldearekin neurtuko ditu indarrak Ohorezko Mailako taldeak. Sasoi bikainean iritsiko da Igor Quindosek zuzentzen duen taldea getariarren aurkako partida honetara, azken hiru partidak jarraian irabazi ostean, sailkapeneko lehen postuan kokatu baitira, Tolosarekin batera, 48 punturekin.
Orain arte bezala, gureek partidaz-partida puntuak batzen jarraitu nahi dute eta orain arte egindako bideak lidertzan jartzera eraman du taldea. Gaur arratsaldean jaitsiera postuetako mamuak uxatu nahi dituen aurkari baten aurka jokatuko dute gureek. Aurreko asteburuan Errenteriako Fanderia futbol zelai zailean Touringi 1-3 irabaztetik iritsiko dira. Neurketa zaila izango da arratsaldekoa, alde batetik aurkariak asko eskatuko dielako gureei, eta bestetik eguraldia dela eta neurketa ez delako egoerarik onenean jokatuko.
Aste osoan zehar, ordea, gureek arratsaldeko lehia prestatzen jardun dute eta atzo arratsaldean burututako azken lan-saioarekin erabaki zuen Quindosek zein 18 jokalari eramango dituen Oriora. Deialdian bi aldaketa egin ditu entrenatzaileak, Ioannes eta Ander Pastrian gaur arratsaldeko neurketan izango baitira Oier Beitia eta Oier Elorzaren ordez. Jarraian deialdia.
