Bihar berebiziko garrantzia duen neurketa jokatuko du Ohorezko Mailako taldeak Txerloian (16:30). Aurrean sailkapenean bost puntu atzetik dagoen Mutriku jasoko dute Igor Quindosen mutilek. Ez da aurkari erraza izango, etxetik kanpo sekulako maila ematen ari baitira mutrikuarrak.
Mutrikutik urrun jokatutako hamar neurketetatik hiru besterik ez dituzte galdu. Urte zaharraren amaiera eta berriaren hasiera garratzak izan ziren kostaldekoentzat, eta ondorioz lehen postuetatik aldenduta ibili dira. Hala ere, azken bost neurketetan lau garaipen eta berdinketa lortu ostean, berriz ere sailkapeneko hiru onenen artean sartzea lortu dute.
Gureak ere indartsu eta sentsazio onekin iritsiko dira, ordea. Azken 21 puntuetatik 15 batzea lortu ostean lehen postuarekiko zuen aldea murriztea lortu dute gureek, eta orain Tolosa hiru puntura besterik ez dute ikusten. Gainera etxean zuten bolada etetea lortu zuten orain bi aste Ordiziaren aurka eta askeago jokatzeko moduan izango dira jokalariak.
Aste honetan ere beste asteetan bezala, hiru lan saio burutu ditu Ohorezko Mailako taldeak eta gaur arratsaldean egindakoaren ostean jakinarazi du Igor Quindos entrenatzaileak eta bere lan-taldeak zein 18 jokalari deituko dituen Mutrikuren aurkako partida jokatzera.
