San Fermin Txiki eguna ospatu dute gaur, asteazkena, Praka Motxakin udaleku irekietan dabiltzan haurrek. Zuri-gorriz jantzita, entzierroa egin dute ehunka umek herriko plazatik Oteiza pilotalekuetara arte, eta hala, Azkoitiko kaleei sanfermin kutsua eman diete.
Udaletxeko balkoian pregoia irakurri dute aurrena bi neskatok, eta plazan elkartuta zeuden haurrek zein begiraleek entzierro aurretik kantatu ohi den abestia kantatu dute, aldizkariak eta egunkariak ondo goian zituztela. Idatzia irakurtzea amaitu orduko jaurti dituzte udaletxeko balkoitik konfetiak, eta haren koloreak plazan zabaltzen hasi direnean atera dira Kontzejupetik zezenez mozorrotutako beste zenbait haur. Haiek ikusi orduko, korrika bizian atera dira ume denak Baztarrikalde aldera.