Urtero legez, Azkoitiko, Azpeitiko eta Zestoako jubilatuek Oriora eta Aginagara egun pasa egingo dute maiatzaren 14an, ostegunez. Egun horretan, 10:30ean abiatuko da autobusa Aizkibel liburutegiaren alboko geralekutik Oriora. Orioko San Nikolas elizan meza izango dute 12:00etan, eta elizkizuna bukatu ostean, 14:00 aldean, Aginagara joango dira, hango Errasti sagardotegian bazkalduko baitute. Bazkalostean, berriz, erromeria izango dute.
Azkoitiko Plaza Ondo jubilatuen elkarteak datorren asteartean, hilak 28, zabalduko du egun pasara joateko izen ematea. Elkarteko bazkideek 45 euro ordaindu beharko dute izen ematea, eta bazkide ez direnek, 50 euro.
Leonera bidaia
Bestalde, Azkoitiko zenbait jubilatu Leonen (Espainia) ibili dira azken egunetan. Hain justu, elkarteak antolatutako lau eguneko bidaian izan dira 42 herritar. Eguraldi ona eta beren arteko giro bikaina uztartuta, gogotik gozatu dute guztiek. Leongo eta inguruko herrietako hainbat eraikin eta pasaia ezagutzeko aukera izan dute bidaiari guztiek.
