Gipuzkoako beste hainbat udalerritan bezala, Azkoitian ere pantaila handi baten bidez jarraitu ahal izango da Realak eta Atletico Madrilek jokatuko duten Espainiako Kopako finala. Apirilaren 18an Sevillan (Espainia) jokatuko duten finala "edonolako gertaera" ez dela argudiatuta, udalak azaldu du herritar guztiei eman nahi diela aukera norgehiagoka horretaz "gozatzeko", eta horregatik jarriko du erakundeak 6x3 metroko pantaila erraldoi bat herriko plazan, nahi duen orok "partidaren inguruko xehetasunik gal ez" dezan.
"Sevillara joan ezin duten zaleek ahalik eta gehien gozatzea da gure nahia, eta talde txuri-urdinarekin batera Igor Zubeldia azkoitiarra animatzea, festa eta ospakizun giroan. Zuzenean eta herri gisa bizi nahi dugu egun horretan La Cartuja estadioan biziko dena ", adierazi du Igor Isuzkiza Kirol zinegotziak.
Egun horretan, 21:00etatik aurrera jarraitu ahal izango da zuzenean partida, eta finala hasi baino lehen, 18:45etik aurrera, kaleak girotzen arituko da Sugarri txaranga.