Haur Hezkuntzatik hasi ondoren, Batxilergoko bigarren eta azken urtean zaudete. Urte eta esperientzia ugari bizi izan dituzte, ezta?
Lide Izagirre: Ume txikiak ginela hasi genuen gure ibilbidea Ikasberrin, beraz, gure bizitzaren une asko, eta, batik bat, bizipen eta ikasketa ugari izan ditugu bertan. Ikasberrin etxeko sentitzen gara, eta konfiantza handia daukagu Ikastolako kide guztiekin. Ez dut dudarik; ikasturtea amaitutakoan urteetan izandako esperientziaren falta sumatuko dugu denok.
Hezkuntza proiektu integrala eta osatua izateak; 0 eta 18 urte arteko ikasleen heziketa eskainiz –Haur Hezkuntza, Lehen Hezkuntza, Derrigorrezko Bigarren Hezkuntza eta Batxilergoa–, eta, batik bat, prozesu guztia eraikin berdinean izateak eragina du horretan?
Beñat Aristegi: Era bat. Gainera, ikaragarrizko garrantzia duela esango nuke, prozesu osoa eraikin berdinean egiteak erosotasun handia ematez gain, ikasketarako beharrezkoa den oreka eskaintzen digu.
L.I.: Horrez gain, eta aurreko galderarekin lotuta, irakasle guztiak ezagutzen ditugu, izan HHtik hasi eta Batxilergorako prozesu guztian zehar ikusi ditugulako. Era berean, urte asko daramatzate ikastolan, eta asko errazten du irakasle guztiak oso gertukoak izateak.
Gertutasun eta ezagutza horiek, gainera, ikasleen jarraipena egitea errazten dute.
B.A.: Ikasle garen prozesu osoan zehar irakasleek jarraipen zuzena egiten digute, izan ere, irakasle guztiek ezagutzen gaituzte, eta asko arduratzen dira gure hezkuntzaz, eta bizitzaz. Azken finean, ikasle bakoitza bakarra da Ikasberrin eta horietako bakoitzaren beharretara egokitutako metodologia du.
Ikasketa prozesua, gainera, naturarekin uztartuta egiteko aukera duzue Ikasberrin.
L.I.: Ezin da ukatu ikastolaren kokapena aldeko puntua dela. Ingurune paregabean dago Ikasberri, naturarekiko harremana errazten digu, horrek dituen onurekin. Egunerokotasunean asko eskertzen dugu, atseden hartzeko orduan, batik bat, berdez eta parkeez inguratuta egotea.
Ikasketa prozesuaz gain, Ikasberrik, Ikastolen Elkarteko kide gisa, badu euskararekiko konpromiso sendoa.
B.A.: Garbi dago euskarak pisu handia duela Azpeitian, eta agian, zentzu horretan, Euskal Herriko beste herriek baino behar gutxiago dugu. Baina, euskarak bizirauteko, ezinbestekoak dira Ikastolak. Euskara eta euskal kultura sustatzeko erreminta dira ikastolak.
L.I.: Korrika eta Kilometroak ekimenek garbi uzten duten beste ideia komunitatearena da. Herrigintza egiteko beste modu bat da ikastola, eta Ikasberrik eta Azpeitiak hori erakusten dute.