Azkoitiko Udalak txakurrentzako jolasak jarri ditu Trenbidearen Zumardian animalia horientzat egokituta dagoen parkean. Txakurrek aske ibiltzeko belardia dute han, eta orain, jolaserako hainbat modulu ere izango dituzte, eremuaz "goza" dezaten. "Helburua da maskoten ongizatea zaintzea, espazio atsegina eta erosoa eskainiz", esan du udalak.
Erakundearen arabera, txakurren aisialdi eremuak "animalien eta pertsonen arteko elkarbizitza" sustatzen laguntzen du, baita animalien jabetza "arduratsuagoa" egiten ere.
Jolasez gain, txakur jabeentzako bi bankurekin ere hornitu dute belardi zati hori. Guztira, 6.523 euroko aurrekontua izan du proiektuak.