EITBk aurki estreinatuko du Irabazi arte euskarazko telesailaren bosgarren denboraldia, eta iaz bezala, estreinaldiaren atarian lehen atalak eskainiko dituzte hainbat herritako aretoetan; tartean, Azkoitian. Otsailaren 1ean izango da emanaldia Baztartxo antzokian, 17:00etan, eta herritarrek dagoeneko eskuratu ditzakete doako sarrerak, entradium.com eta azkoitia.eus atarietan.
Honako hau da bosgarren denboraldiaren sinopsia: Arene eta bere lagunek institutuko azken urteari aurre egingo diote. Azken urtea lasaia izango zela ematen zuen arren, azkenean, ez da hola izango: norbait ez dago klubeko festa egunean gertatutakoa ahazteko prest eta denek ordaindu beharko dute zorigaiztoko gau hartan egindakoagatik.