Urrategi auzoko ur hornidura hodiak instalatzen hasi da Gipuzkoako Urak aste honetan, Etxeberri baserriaren inguruko eremua sareko urez horni dadin. Hain zuzen, obra horien bidez Etxeberri eta Txomingorri baserriak lotuko ditu 620 metroko polietilenozko eroanbide batek.
Udalak azaldu duenez, Oñartxoko depositutik Txomingorriraino hornitzen duen ur sarea orain dela gutxi berritu da, eta modu horretara, tratatutako urak hornituko du zonaldea. Horren helburua da ur sarea zabaltzea eta Urrategiko hornidura ur tratatuarekin osatzea.
Hondatuta edo zaharkituta geratu diren ur instalazioak berritzea helburu duen Azkoitiko Udalaren eta Gipuzkoako Uraken hitzarmenaren barruan ari dira lanak gauzatzen. Erakundearen arabera, zazpi aste inguru iraungo dute aste honetan hasi dituzten lanek, eta 69.759 euroko aurrekontua dute.