Kantakidetza Gipuzkoako osasun publikoko profesionalen abesbatzak, kontzertua eskainiko du bihar, zapatua, Andre Mariaren Jasokundeko parrokian. 20:00etan hasiko da emanaldia, eta koruak askotariko abestiak eskainiko ditu, ikus-entzuleak Gabon giroan murgiltzeko asmoz.
Abesbatza 2009an sortu zuten, Gipuzkoako Osakidetzako zenbait langileren musika zaletasunak sustatuta. Errepertorio zabala du koruak, eta agerian utziko dute hori bihar hango abeslariek. Wolfgang Amadeus Mozart koroatze mezarekin ekingo diote emanaldiari, eta ondoren, honako abesti hauek eskainiko dituzte: Lux beata trinitas (Ola Gjeilo), Gesu bambino (Pietro A. Yon), O holy night (Adolphe Adams), Adeste Fideles (David Willckocks) eta Hator, hator mutil (Jesus Guridi).