Egunak besterik ez dira gelditzen Gabonetan murgiltzeko. Azkoitia prest da neguko jaiegunetan murgiltzeko; izan ere, udal langileek egunotan lanean ari dira Gabonetako argiek herrian dir-dir egin dezaten. Udalak azaldu duenez, bihar, osteguna, hasiko dira argiak pizten.
Bihar, baina, hainbat kaletako argiak baino ez dituzte piztuko. Honako azalpena eman du udalak: "Gabonetako argiak ez dira denak egun berean pizten, horiek ez baitaude elektrizitate linea bakar batera konektatuta. Bihar, esaterako, herrigunekoak piztuko dituzte", azaldu du udalak.
Erakundeak ostiralerako espero du gainerakoak piztea, baina datorren astearterako ere utziko dituzte pare bat puntu, "oraindik argien instalazio lana egiten" ari baitira zenbait gunetan.